Nuna tamakkerlugu suliniutit

Kommunimi inoqarfinni amerlanerni ineriartorneq minnerusumik annerusumilluunniit siumut eqqoriarneqarsinnaasoq, inoqarfinnut ataasiakkaanut takutinneqartoq, avataaniit pisumit imaluunniit pisoqarneratigut aalajangiisumik ineriartornermut sunniuteqarsinnaavoq. Tamatumani soorunami siullertut aatsitassaqarnerup iluani periarfissat eqqarsaatigineqarput – piviusunngortinneqarpata – sumiiffimmi nunallu immikkoortuani nunassittarnerup nuttattarnerullu ingerlaasianik allannguisinnaammata. Saniatigullu attaveqaatinut tunngasut allannguiffiusinnaapput – siullertut mittarfiit inissinneqarnissaat eqqarsaatigalugu.

Pingaarnertut ilusilersuinermi piffissaq qaninneq, ungasilaartoq ungasinnerusorlu eqqarsaatigalugit nunap immikkoortuini ataasiakkaani ineriartortinneqarsinnaasut suliarineqarput. Ungasinnerusoq eqqarsaatigalugu ineriartortinneqarsinnaasuni ataatsimoorussat qaninnerusukkut pisinnaaneri takuneqarsinnaasunngortinneqarput, taamaaliornikkut pingaarnertut ilusissat pitsaanerulersinneqarlutik.

Ataatigut allassimasuni nunap inissisimaneranut tunngasut pingaarutillit aalajangersaavigineqanngitsut – aatsitassat attaveqaatillu – naatsumik allaaserineqarput piffissami kommunip pilersaarusiornerani annertuumik allannguisinnaasut paasitikkumallugit.