Nuuk Paamiut Ittoqqortoormiit Tasiilaq Nunaqarfinni Nunaannaq Suliniuteqarfiit

Nunaannaq

Nunaannaq kommunimut pilersaarut eqqarsaatigalugu kommunimi immikkoortut, nuuffissatut atugassanngortitaanngitsut, ataatsimut taaguutigivaat.

Nunaannaap pilersaarusiorneqarneranut nunaminertanillu aqutsinermut atatillugu siusinnerusukkut isumaqartoqartarpoq nunaannarmi inissaqarluartoq. Taamaattumik nunaannarmi nunaminertamik atuisinnaanermut qinnuteqartoqaraangat suliamiit suliamut aalajangiisoqaannartarnissaa naammattoq naliliisoqarsimavoq. Nunaminertanik atugassanngortitsinermut atatillugu ataqatigiinnerusumik ataatsimoortumik pilersaarusiortoqarnissaa pisariaqartinneqartoq naammaatoorneqarsimanngilaq.

Nunaannaq sammisassanut sunilluunniit siunertalinnut tamanut inissalittut isigineqarsinnaajunnaarpoq. Nunaannarmi nunaminertanik soqutigisallit allallu amerlasuut atuileraluttuinnalerput. Nunaannaap atorneqaleriartuinnarneranik  tamanna pilersitsivoq, soqutigisalinnit ataasiakkaaginnarnit piinnanngitsumik. Soqutigisallit assigiinngitsut ataatsimut sunniutaat atuinerulernermik pilersitsivoq. Nunaannaap annertusigaluttuinnartumik atorneqaleriartuinnarneqarnera soqutigisalinnit assingiinngitsuneersuuvoq. Nunaannaap atorneqaleriartuinnarnera ilutigalugu pilersaarusiornissaq pisariaqaleriartuinnarpoq, soqutigisat assigiinngitsut ataatsimoortillugit.

Nunap pilersaarusiornera pillugu malittarisassamiit kommunimut pilersaarummut

1. januar 2011 aallarnerfigalugu nunaannaap pilersaarusiorneqarneranut nunaminertallu pillugit oqartussaaneq kommunimit tiguneqarpoq, ulloq taanna tikillugu Naalakkersuisuniissimagaluartoq. Kommunimut pilersaarummi matumani najoqqutassat aalajangersakkallu Kommuneqarfik Sermersuumit ilanngunneqarput, nunaannaap pilersaarusiorneqarneranut aalajangersakkat–ni aalajangersarneqartarsimagaluartut. Annerusumik nunaannaap immikkoortukkuutaanut agguataarneqarnissaa kiisalu taakku immikkoortut ilaasa pingaarnertut aalajangersaavigineqarnissaat pineqarluni. Aalajangersakkat nunamik pilersaarusiornermut malittarisassanit allanngortinnagit nuunneqarput. Taamaattorli immikkoortup ilaa nunaannarmut pilersaarut nr. 7, Itinnera, akuerisaq tunngavigalugu atugassanngortinneqarpoq. Tamanna erseqqinnerusumik Nuup eqqaani nunaannaq-mi allaaserineqarpoq.

Aalajangersakkat pingaarnerit kommunimit nutarterneqarsinnaapput kiisalu aalajangersakkat pingaarnerit malillugit immikkoortut ilai sukumiinerusumik aalajangersaavigisinnaallugit. Nunaannarmulli aalajangersakkanik allannguineq sukkulluunniit Namminersorlutik Oqartussat soqutigisaat malillugit pisassapput.

Pilersaarusiorneq tamatumalu malitsigisaanik nunamik pilersaarusiornermut malittarisassani immikkoortut ilaannik toqqartuineq kommuniusimasuni pisimanngilaq assigiiaaranilu. Pingaartumik nunaqarfiusimasut illuaraqarfiillu pilersaarusiornerat matumani pineqarpoq. Tamatuma kinguneranik piffissami aggersumi nunaannaap pilersaarusiorneqarnerata, Namminersorlutik Oqartussanit tiguneqartup, iluarsaannissaa pisariaqarpoq, annertussusiata misissorneqarnera ilutigalugu aamma immikkoortut manna tikillugu pilersaarusiorfigineqanngitsut isummerfigineqarlutik.

Nunaannarmut pilersaarutit

Nunaannarmut pilersaarutit arlallit atuupput, Nuup Kommunearisimasaanit Naalakkersuisunillu akuerineqartut. Nunaannarmut pilersaarutit atorlugit Naalakkersuisut akuerisaannik kommunit nunaannaap iluani nunaminertanik atugassiisinnaaneq tiguaat.

Nunaannarmut pilersaarutit suli atuutsinneqassapput. Kommunimut pilersaarummi nunaannarmut pilersaarutini immikkoortut ilai immikkoortut ilai allat assigalugit ilaatinneqassapput.

Nunaannarmut pilersaarutit amerlanerit sunngiffimmi illuaqqanut aasarsiortarfinnut il.il. tunngapput. Taakku saniatigut immikkoortut ilai ataasiakkaat sukisaarsaarfiusinnaasutut immikkut inissisimatinneqarput. Assersuutigalugu immikkoortut ilai Itinnera (lejrskoleqarfissatut atugassanngortinneqartoq) aamma Qooqqut taamatut inissisimapput (sukisaarsaarfittut atugassatut aamma takornariaqarnermut siunertanut nunaminertallu sunngiffimmi illuaqqanut aasarsiortarfinnut takornarianullu illuaqqanut atugassanngortinneqarlutik).

Namminersorlutik Oqartussat nunaannarmi soqutigisaat

Nunaannarmi immikkoortut arlallit soqutigisaqarfittut toqqarneqartut saniatigut kommunip pilersaarusiornermini immikkut sianigisassarivai. Pineqarput avatangiisip illersorneqarnissaa, pinngortitap mianerinissaa, kulturikkut oqaluttuarisaaneq telellu attaveqaatai.

Soqutigisat taaneqartut nunaminertamik atuinermut pingaaruteqarnerat malillugu aalajangersakkat taakkununnga attuumassutillit immikkoortut ilaanut ataasiakkaanut aalajangersakkanut ilanngunneqarput. Avatangiisip illersorneqarnissaa, pinngortitap mianerineqarnissaa, kulturikkut pigisat illersorneqarnissaat, immikkut killeqarfilersuutit il.il.pillugit pingaarnertut inatsit suli atuuppoq immikkoortut ilaannut ataasiakkaanut pingaarnertut aalajangersakkat apeqqutaatinnagit.





Kingullermik iluarsineqarpoq 1-5-2016


WEB by COWI