Nuuk Paamiut Ittoqqortoormiit Tasiilaq Pingaarnertut iluseq Immikkoortortat qitiutinneqartut Isertoq Tiilerilaaq Kuummiut Sermiligaaq Kulusuk Nunaqarfinni Nunaannaq Suliniuteqarfiit

Kuummiut

2015-mi januaarip aallaqqaataani nunaqarfimmi najugaqavissut 310-pput. Taamaalilluni Kuummiut immikkoortumi nunaqarfinnit annersaavoq. Ukiunili kingullerni inuttussutsimigut appariartorfiuvoq naatsorsuutigineqarporlu taamaaginnanngikkuni inuttussuseq aalaakkaanerulissasoq.

Pingaarnertut iluseq

Inissiaqarfiit

Inissiat 99-iupput, taakkunannga 40-t inoqanngillat, tassalu 40 %-ii. Nunaqarfiup qeqqata avannaani kangianilu inissiat inissisimapput umiarsualivimmut immikkoortunullu ataatsimoorussanut attaveqarluarlutik.

Inuttussutsikkut aamma inuussutissarsiornikkut ineriartorneq tunngavigalugit kommunalbestyrelsimit Kuummiuni nunaminertanik nutaanik inissianut siunertalinnut atugassiisoqarnissaa pisariaqanngitsoq nalilerneqarpoq. Piffissami pilersaarusiorfiusumi inissianik pitsanngorsaanerit, ingitserinerit inissianillu allatut ilusilersuinerit – innuttaasut peqataatillugit – ingerlanneqassapput.

Ataatsimoorussaqarfiit

Kuummiut nunatamigut immikkuullarissuunerata oqaluttuarisaanikkullu ineriartornerata kinguneraa nunaqarfiup ataatsimoorussaqarfiisa siammasissumik inissisimanerat – taamaattorli amerlanerit nunaqarfiup kangimut kimmullu aqqutaanut atapput. Umiarsualiviup avannannguani pisiniarfik, allakkerivik, kommunip allaffia innaallagissiorfillu inissisimapput. Kangianiipput katersortarfik, ungdomsklubbi qatserisarfillu. Atuarfik atuagaateqarfillu nunaqarfiup avannamut kitaaniipput. 

Allanngutsaaliugassatut soqutigisat 

Nunaqarfimmi arlalinnik illunik pisoqqanik illoqarpoq, ilaatigut atuarfik oqaluffiuutigisoq 1914-imeersoq. Illunik illukunilluunniit allanngutsaaliugassanik nalunaarsugaqanngilaq.

Inuussutissarsiuteqarfiit

Kuummiuni nunap immikkoortuani aalisakkeriviit anginersaat NUKA A/S-imit ingerlanneqartoq ippoq. Nioqqutissiarineqartut amerlanerpaartaat Sermiligaami piniartunit tunisaapput. Tunisassiorfik ukiuni kingullerni piffissap ilaani uninngatinneqartarpoq aalisarnerup annikillisimanera  pissutigalugu.

Kuummiut aamma Sermiligaaq peqatigiillutik aalisarnerup iluani periarfissaqarput Kuummiuni peqassuseq tunitsiveqarsinnaanerlu tunngavigalugit – Kommunalbestyrelsimit nunaqarfiit taakku marluk aalisakkanik tunisinermut suliarinneqqaarnermullu qitiutinneqarnissaat kissaatigineqarpoq. 

Angallannermut, teknikkimut avatangiisimullu tunngasut

Helistop nunaqarfiup kangiani inissisimavoq.

Aqquserngit aqqusineeqqallu 2,6 kilometeritut isorartussuseqarput.

Nunaqarfik nunaqarfiup qiterpasissuani inissisimasumit innaallagissiorfimmit innaallagissamik pilersorneqarpoq.

Imermik pilersuineq nunaqarfiup avannaani tatsimit erngup aqqutaatigoortillugu pivoq ukiumilu imermut tanki imertarfigineqarsinnaasoq atorneqartarpoq. Taseq imeqarfiusoq kaajallallugu pallinneqaqqusaannginneranut killeqarfeqarpoq.

Tankeqarfillu atuuttoq kaajallallugu aamma 50 meterit missiliorlugit palleqqusaannginneranut killeqarfiit aalajangersarneqassapput.

Imikoorut qasertoq nunamut kuutsinneqartarpoq. Nunaqarfiup kujammut kangiani anartarfilerinermut aaqqissuisoqarpoq eqqaavittalimmik. Tassani igitat ikuallaaveqartinneqarput.

Kuummiut umiarsualivii tassaapput nunaqarfiup umiarsualivia tunisassiorfiullu eqqaani umiarsualivik. 


Kuummiut pingaarnertut iluseq



Kingullermik iluarsineqarpoq 31-3-2016


WEB by COWI